Страница 16 из 24
7. Да се яз молъвлю и уставил есми епископью, поручен Смоленск богом и деднею и отцовою молитвою, да се яз князь Ростислав, с первым епископом своим Маноилом, да се уставляю яз. Аж будет или тяжа, или продажа епископля, да ненадобе ни князю, ни посаднику, ни тивуну, ни иному никому же от мала и до велика, и по всей 67 волости Смоленской. Се же ныне, с божьею помощью и со святою богородицею, в сии дни полны дани, а по сем что бог устроить; по божью строю чи которая дань оскудееть, или ратью, или коим образом, [п]о силе что почнеть давати тыи дани, а из того десятина святей Богородици.
Да сего не посуживаи никтоже по моих днех, ни князь, ни людие; аще ли кто посудить сея грамоты, что есми дал к святей Богородици, да той отвечает в страшныи день святей богородица, и сия клятва будеть на нем, а яз буду без греха…
9. [Се] яз, грешный сын Мьстиславль, надеяся на матерь божью на святую богородицу, уставляю сию епископью; даж кто разрушит ю, да сам отвечаеть святей богородици, и сия клятва святых отец буди на нем, а яз буду без греха.
ГРАМОТА ВЕЛИКОГО КНЯЗЯ МСТИСЛАВА ВЛАДИМИРОВИЧА И СЫНА ЕГО ВСЕВОЛОДА НОВГОРОДСКОМУ ЮРЬЕВУ МОНАСТЫРЮ НА СЕЛО БУЙЦЫ, ПОЛЮДЬЕ И СЕРЕБРЯНОЕ БЛЮДО 1125–1132 гг.
Се аз, Мьстислав Володимирь сын, дьржа Русьскую землю, в свое княжение повелел есмь сыну своему Всеволоду отдати [Буи]це святому Георгиеви с данию, и с вирами, и с продажами, [и вено во…кое]. Даже который князь по моемь княжении почьнеть хотети отъяти у святаго Георги [я, а] бог буди за темь и святая богородица, и тъ святыи Георгии у него то отимаеть. И ты, игумене [Исаие], и вы, братие, донеле же ся мир състоить, молите бога за мя и за мое дети, кто ся изоостанеть в манастыри, то вы темь дължьни есте молити за ны бога и при животе и в съмьрти. А яз дал рукою своею и осеньнее полюдие даровьное, полътретиядесяте гривьн святому же Георгиеви. А се я, Всеволод, дал есмь блюдо серебрьно в [30] гривн серебра святому же Георгиеви; велел есмь бити в не на обеде, коли игумен обедает. Да же кто запъртить или ту дань и се блю [до, да судит ему бог в день пришьствия с] воего и тъ св[ятыи Георгии].
ГРАМОТА ВЕЛИКОГО КНЯЗЯ ВСЕВОЛОДА МСТИСЛАВИЧА ЮРЬЕВУ МОНАСТЫРЮ НА ТЕРПУЖСКИЙ ПОГОСТ ЛЯХОВИЧИ 1125–1137 гг.
Сеаз князь великыи Всеволод дал есмь святому Георгию Терпужьскыи погост Ляховичи с землею, и с людьми, и с коньми, и лес, и борти, и ловища на Ловати, а по Ловати на Низ по конец Водоса за рекою за Любытиною по больший мъхи, с больших мхов на вьрх межьника, с того межьника на Каменичища на усть Березна, со обе стороны межьник ввьрх Березна, по обе стороны ввьрх Березна на вьрх Глистьныпо чистый мох, от Морее с вьрх Глистьне на вьрх Робьи Ильмны, с вьрх Робьи на вьрх Лебединьца, с вьрх Лебединьца на вьрх Възвада, с вьрх Възвада на вьрх Городьни, на низ по одной стороне до Робьи. А то дал есмь святому Георгию во векы. А хто поступить, судиться со мною перед Георгиемь в сии век и в будущий.
ГРАМОТА ВЕЛИКОГО КНЯЗЯ ИЗЯСЛАВА МСТИСЛАВИЧА НОВГОРОДСКОМУ ПАНТЕЛЕЙМОНОВУ МОНАСТЫРЮ 1146–1155 гг.
Се аз князь великий Изяслав Мьстиславич по благословению епискупа Нифонта испрошал есмь у Новагорода святому Пантелемону землю село Витославлицы и смерды и поля Ушково и до прости. А завод той земли от Юрьевьской орамицы простью вверх, и с прости возли Ушковскую орамицу по верхней стороне да направо в лог, логом по верховью Мячина и Мячином вниз по вешную воду к Добрыне улицы к образу святому, и от Добрыне улицы Мячином вверх подле рель да налево в Великий ручей, ручьем вверх подли княжую рель до Юрьевского межника, что крест стоит под межником, от Юрьевского межника логом подле Юрьевскую рель, да подле Юрьевскую орамицу логом да по конец логу промеж орамицы Юрьевской и Ушкова поля да в прость. И устроил есми святому Пантелемону монастырь и посадил есми 69 в нем игумена Аркадия. Аболе в тую землю, ни в пожни, ни в тони не вступатися ни князю, ни епискупу, ни болярину, ни кому. А хто ловит рыбу, доложа игумена. А смердам витославлицам не потянути им ни ко князю, ни к епискупу, ни в городцкии потуги, ни к смердом ни в какии потуги, ни иною вивирицою, а потянути им ко святому Пантелемону в монастырь к игумену и к братьи. А хто почнет вступатися в тую землю, и в воду, и в пожни или князь, или епискуп, или хто имет силу деяти, и он во второе пришествие станет тяжатися со святым Пантелемоном.
ДУХОВНАЯ АНТОНИЯ РИМЛЯНИНА (НЕ ПОЗДНЕЕ 1147 Г.)
Се яз, Антонии, хужши во мнисех, изыдох на место сее, не приях и имения ото князя ни от епискупа, но токмо благословение от Никиты епискупа. И паша по чюжеи земле ни вдвое ни воедино, ни себе покоя не дах, и братьи и сиротам и зде крестьяном досажая. Да то все управит мати божия, что есмь беды принял о месте сем. А се поручаю богу и святей богородицы и крестьяном, и даю в свободу, и се поручаю место се на игуменство. Хто мое слово худое преступит, судит ему бог и святая богородица или бог отведет. А кого изберут братья, но от братьи, и иже кто в месте сем терпит. А которой брат наш да от места сего начнет хотети игуменства или мздою или насильем, да будет проклят; или ото князя начнет по насилью деяти кому или по мзде, да будет проклят; или епискуп по мзде начнет кого ставити, илиин станет насильством творить на месте сем, да будет проклят. И се возвещаю: да егда седох на месте сем, дал есмь на земле и на тони семдесят гривен, на селе есмь дал гривен сто на Волховском, Тудоре з женою и з детми одерень, Волос з женою и з детми одерень, Василеи з женою и з детми одерень. Аще сию грамоту хто преступит, да будет проклят треми сты святых отец и осмьюнадесят и буди ему со Июдою причастье.
ДАННАЯ ВАРЛААМА СПАСО-ХУТЫНСКОМУ МОНАСТЫРЮ НА ЗЕМЛЮ С УГОДЬЯМИ, ЧЕЛЯДЬЮ И СКОТОМ (ОКОЛО 1192 Г.)
Се въдале Варламе святому Спасу [з]емлю, и огород, и ловища рыбьная и гоголиная, и пожни: 1) рьль противу села за Волховом, 2) на Волхевьци коле, 3) корь, 4) ло[зь], 5) волмина, 6) на острове и с нивами. Вху же ту землю Хути[ньскую] въдале святому Спасу и с челядию и с скотиною. А се брат[ии дал]: 1) отрок с женою, 2) Вълос, 3) девъка Феврония с двема сын[овьци], 4) недачь; а конь шестеро и корова. Се другое село на Слудици за … бнею въдале святому Спасу, и божниця в немь святаго Георгия, и нивы, и пожни, и ловищя и еже в немь. Се же все дал Варлам Михалев сын святому Спасу. Аще кто дияволъмь [науч]ен и злыми [человекы наважен цьто) хочеть отъяти, от нив ли, от пожьнь ли, или от ловищь, а буди ему противе[н] святыи Спас и в сь век и в будущий.
ЦЕРКОВНЫЕ ПРАВИЛА О ЧЕЛЯДИ, ХОЛОПАХ, ИЗГОЯХ, СМЕРДАХ
А се грехи
2. Аще кто без вины порабочиваеть человека поклепомь.
3. Пожаровое грабление.
4. Аще кто на изгол емлет куны.
5. Аще кто бес правды насилуеть на челядь свою и морить гладомь и раною и наготою и деломь насиляа.
6. Аще кто пригородить чюжаго двора, или нивы, или пожни, или винограда.
7. Аще кто варить корчьмоу и прикуп корчемный во грех.
8. Аще кто клеветою отглаголеть.
9. Аще кто в разбои добудеть имениа.
10. Аще кто продаеть челядь излиха возметь цены его на немь. Такоже аще кто выкупается на свободу толико же дасть на себе елико же на немь. Аще ли боле, то грех.
71 Аще кто емлеть куны на изгоевых детех, то обращется продая кровь неповинную.
ПРАВИЛО С ИМЕНЕМ МАКСИМА
7. Аще кто с робою своею блуд сътворит и родит отроча, освободит рабу свою и постится лето едино.
8. Аще ли кто свое детя продаст не имеа, 5 лет поста. Аще ли имеа, да постится 18 лет.
9. Аще кого продадят или умучят – пост 7 лет, а поклонов 600 на день.