Страница 18 из 19
Господи Боже, Вседержителю, призри на нас, грешных и недостойных чад Твоих, согрешивших пред Тобою, прогневавших благость твою, навлекших гнев Твой праведный на ны, падших во глубину греховную. Ты зриши, Господи, немощь нашу и скорбь душевную, веси растление умов и сердец наших, оскудение веры, отступление от заповедей Твоих, умножение нестроения семейных, разъединения и раздоры церковные. Ты зриши печали и скорби наша, от болезней, гладов, потопления, запаления и междоусобныя брани происходящия. Но, Премилостивый и Человеколюбивый Господи, вразуми, настави и помилуй нас, недостойных. Исправи жизнь нашу греховную, утоли раздоры и нестроения, собери расточенные, соедини разсеянные, подаждь мир стране нашей и благоденствие, избави ю от всяких бед и несчастия. Всесвятый Владыко, просвети разум наш светом учения евангельского, возгрей сердца наша теплотою благодати Твоея и направи я к деланию заповедей Твоих, да прославится в нас Всесвятое и Преславное Имя Твое, Отца и сына и Святого Духа, ныне и присно и во веки веков. Аминь.
Святый и великий Архангеле Божий Михаиле, неисповедимыя и пресущесвенныя Троицы первый во Ангелах предстоятелю, рода же человеческого приставниче и хранителю, сокрушивый воинствы своими главу прегордаго денницы на небеси, и посрамляяй выну злобу и коварства его на земли, к тебе прибегаем с верою и тебе молимся с любовию, буди щит несокрушим и забрало твердо святей Церкви и Православному Отечеству нашему, ограждая их молниеносным мечем твоим от всех враг видимых и невидимых; буди Ангел Хранитель премудр, светодатель и споспешник стране нашей, износя ей от Престола Царя царствующих просвещение и силу, радость, мир, утешение; буди вождь, соратай непобедим Христолюбивому Воинству нашему, венчая его славою и победами над супостаты, да познают вси противляющиеся нам, яко с нами Бог и святии Ангелы Его. Буди столп и защитник сущим в пленении, предстоятелям чад, святых Божиих Церквей. Не остави нас, о Архангеле Божий, помощию и заступлением твоим и нас, прославляющих днесь святое имя твое; се бо аще и многогрешни есмы, обаче не хощем в беззакониях наших погибнути, но еже обратимся ко Господу и оживленными быти от Него на дела благая. Озари убо ум наш светом Лица Божия, иже непрестанно сияет на молниеносном челе твоем, да возможем разумети, что есть воля Божия о нас благая и совершенная, и ведете вся, еже подобает нам творити и еже презирати и оставляти. Укрепи благодатию Господнею слабую волю и немощное произволение наше, да утвердившеся в законе Господнем, престанем ваятися земным помыслы и похотения плоти, увлекаяся, по подобию несмысленных детей, скорогибнущим красотами мира сего, яко ради тленнаго земнаго, безумне забыти вечная и небесная. Над всеми же силами испроси нам свыше дух истинного покаяния, нелицемерную печаль по Бозе и сокрушение о гресех наших, да остающее нам число дней, временного живота нашего, иждивем не во угождении чувств и работе страстем нашим, но во изглажении зол, содеянных нами, слезами и сокрушения сердечного, подвигами чистоты и святыми делами милосердия нашего и освобождения от уз бренного сего телесе, не остави нас, Архангеле Божий, беззащитных противу духов злобы поднебесных, обыкших преграждати душе человечестей восход в горняя, да охраняеми тобою беспреткновенно достигнем оных преславных селений райских, идеже несть печаль, ни воздыхание, но жизнь бесконечная, и сподобльшеся узрети пресветлое лице Всеблагого Господа и Владыки нашего, падше со слезами у ног Его, в радости и умилении воскликнем: «Слава Тебе, дражайший Искупителю наш, иже за премногую любовь Твою к нам недостойным, благоволил еси послати Ангелы Твоя в служение, к спасению нашему!» Аминь.
Господи Боже, Спасителю наш! К тебе прибегаем сокрушенным сердцем и исповедуем грехи и беззакония наша, имиже раздражихом Твое благоутробие и затворихом щедроты Твоя. Отступихом бо от Тебе, Владыко, и заповедей Твоих не соблюдохом, ниже сотворихом, якоже заповедал еси нам. Сего ради разгневался еси яростию Твоею на нас, и посетил еси жезлом железным беззакония наша и ранами неправды наша. Простерл еси руку Твою, и восплакася земля, и болезни смертные объяша нас. Гладом же и скудостию и нестроением поразил еси нас, и дал еси нас на попрание врагом нашим, и умалихомся паче всех язык, и быхом в притчу и поношение соседом нашим. Боже великий и дивный, каяйся о злобах человеческих, возводяй низверженныя и утверждаяй низпадающия! Небесную Твою силу с небес ниспосли, уврачуй язвы душ и телес наших и воздвигни нас от одра болезни, яко наполнишася разслабления чресла наша, яко болим неправдою и рождаем беззаконие. Утоли шатания и раздоры в земли нашей, отжени от нас зависти и рвения, убийства и пиянство, разжения и соблазны, попали в сердцах наших всякую нечистоту, вражду и злобу, да паки вси возлюбим друг друга и едино пребудем в тебе, Господе и Владыце нашем, якоже повелел еси и заповедал еси нам. Помилуй нас, Господи, помилуй нас, яко исполнихомся уничижения и несмы достойны возвести очеса наши на небо. Помяни милости, яже показал еси отцем нашим, преложи гнев Твой на милосердие и даждь нам помощь от скорби. Молит Ты Твоя церковь, представляющи Тебе ходатайство другов Твоих: Преподобного отца нашего Сергия Радонежского, Петра, Алексия, Ионы и Филиппа, Святителей Московских, священномученника Ермогена и Всех Святых, в 3емле нашей просиявших, изряднее же Пресвятыя Богородице и Приснодевы Марии, от лет древних покрывшая и заступавшая страну нашу. Вразуми и укрепи всех, иже во власти суть, и возглаголи в них благая о церкви Твоей и о всех людех Твоих. Силою Креста Твоего укрепи Христолюбивое Воинство наше и избави их от всякого навета вражия. Воздвигни нам мужей силы и разума, и даждь всем нам Духа Премудрости и страха Божия, духа крепости и благочестия.
Призри и на собор наш церковный, от всех концев Российския 3емли собравшийся, умудри и просвети его благодатию Пресвятого Твоего Духа, и даждь ему слово во отверзение уст его, во утверждение Святыя Православныя Веры нашея, в примирение и соединение отпадших, в обновлении мира и любве в сердцах наших.
Господи, к Тебе прибегаем, научи нас творити волю Твою, яко Ты еси Бог наш, яко у Тебе источник живота, во свете Твоем узрим свет. Пробави милость Твою ведущим Тя во веки веков. Аминь.
Господи, Ты видишь хитрость врагов Православной Веры и Церкви Твоей и их рвение одолеть Ея. Положи им конец, да умрет с этими людьми все лукавое дело их.
Боже великий и дивный! Утоли шатания, раздоры в земле нашей, огради нас от гнева, убийства, вражды и злобы. Да вновь возлюбим друг друга и едино пребудем в Тебе, Господе и Владыке нашем, как Ты повелел и заповедал нам. Аминь.
О всеблаженнии и богомудрии угодницы Божии, подвиги своими 3емлю Русскую освятившии и телеса своя, яко семя веры, в ней оставльшии, душами же своими Престолу Божию предстоящии и непрестанно о ней молящиеся! Се, ныне в день общего вашего торжества мы, грешнии, меньшии братия ваши, дерзаем приносити вам хвалебное пение. Величаем ваша великия подвиги, духовнии воины Христовы, терпением и множеством до конца врага низлошившии и нас от прелести и козни его избавляющи. Ублажаем ваше святое житие, светильницы Божественнии, светом веры и добродетелей светящиеся и наши умы и сердца богомудренно озаряющии. Прославляем ваши великие чудеса, цвети райстии, в стране нашей северней прекрасне процветшии и ароматы дарований и чудес повсюду благоухающии. Восхваляем вашу богоподражательную любовь, предстателие наши и покровителие, и уповающе на помощь вашу, припадаем к вам и вопиим: равноапостольнии просветителие наши! Споспешествуйте людей Русския 3емли преданную вами веру православную твердо содержати, да спасительное семя, вами всеянное, не изсушено будет зноем неверия, но, дождем Божия поспешения напоенное, плод изобильный да принесет. Святитилие Христовы! Молитвами вашими утвердите Церковь Русскую, ереси, расколы и нестроения в ней потребите, расточенныя овцы во едино соберите и от всяких волков, во одежде в стадо Христово входящих, оградите. Преподобние отцы! Сохраните нас от прелестей мира сего лукавого, да, отвергшеся себе и вземше крест свой, последуем Христу, распинающе плоть свою со страстьми и похотьми, носяще тяготы друг друга. Благовернии князие! Воззрите милостивно на земное отечество ваше к вся нечестия и соблазны, в нем ныне сущие, оружием молитв ваших потребите, да, якоже древле, тако и ныне, и в грядущее время, прославляется на Святей Руси имя Господне. Страстотерпцы Российстии преславнии! Укрепите нас в мужественном стоянии даже до крове за Веру Православную и обычаи Отечества, да и скорбь, ни теснота, ни гонения, ни глад, ни нагота, ни беда, ни меч не возмогут нас разлучити от любве Божия, яко о Христе Иисусе. Блажении, Христа ради юродивии и праведнии! Посрамите мудрость века сего, возносящуюся на разум Божий. Нам же помозите, спасительным буйством креста Христова утвердившееся, соблазны мудрости мирския незыблемым быти, горнее присно, а не земное помышляти. Богомудрыя жены, в немощнем естестве подвиги велия явившия! Молитеся, да дух вашея любве ко Господу и ревность о угождении и о своем и ближнего спасения не оскудевает в нас. Вси святии сродницы наши, от лет древних просиявшии и в последния дни подвизавшиеся, явленнии и неявленнии, ведомии и неведомии! Помяните нашу немощь и уничижения и молитвами вашими испросите у Христа Бога нашего, да и мы, безбедно преплывше житейскую пучину и невредимо соблюдше сокровище веры, в пристанище вечного спасения достигнем и в блаженных обителях горнего Отечества вкупе с вами и со всеми угодившими ему от века святыми водворимся, благодатию и человеколюбием Спасителя нашего Господа Иисуса Христа, емуже со превечным Отцем и Пресвятым Духом подобает непрестанное славословие и поклонение от всех тварей во веки веков. Аминь.