Страница 2 из 26
А сына своего Юрья благословляю трет[ь]ю в Москве княжа Володимеровъскою с сыном своим с Ондреем з Болшим по половинам, а держать по годом. Да Юрью же сыну придаю год в Москве княжы Костянтиновский Дмитреевича. Да даю ему Дмитров со всеми волостми и с путми, и с селы, и со всеми пошлинами, и с замос[ковс]кими волостми и с всем с тем, как было за князем за Петром. Да ему же даю Юлку с Юлоцскими бортъники и что к Юлке потягло, да Серебожь, да Бускутово, да Рожеств[е]ное, и с вс[е]м с тем, что к тем волостем потягло. Да даю сыну же своему Юрью Можаеск с волостми и с путми, и селы и с всеми пошлинами, и с Медынею, и что к Медыни потягло, да Серпохов, да Хотунь и со всеми пошлинами. А чем его благословила моя баба, великая княгини Софья, его прабаба, и в духовно[й] ему в своей написала, Семчинским селом у Москвы з дворы с городскими и [с] Самсоновым лугом, да Кжелью, да и своим прикупом селцом Воробьевским и с Семено[в]ским и и з д[е]р[е]внями. Да на Похре селом Мячковым и с Фаустовым, и с Лодыгиным, и с Федоровым Левонтьева, и с Тяжиным, и с рыболовлими деревнями, а ис коломенских сел Велина Гора, Кривцево, Бронничо, Чевырово, Марчюково да Рожок, да починок у Щелина озера, да из юрьевских сел турабье[в]ские села вси, да Кучка, да Деревенька, да Шадрино, ино то его и есть. Да к тем селом к тарабьевским придал есми ему село Шипиловское со всем. А на Костроме дала ему баба село Качаловское, да Ушаковское, да Святое село, а на Вологде масленицьскии села, да янгусарьскии, да говоровскии села и что к ним потягло, ино то его и есть. А всхочет мой сын Иван выменити у своего брата Урья коломенскии села, ино сын мой Юрьи те села ему променит, и сын мой Иван выменить у него те села, его не изобидит.
А сына своего Андрея благослов[л]яю, даю ему с старешим его братом с Юрьем треть в Москве княжу Володимеровскую по половином, а держати по годом. Да даю ему Углич со всеми волостми и с путми, и с с[е]лы, и со всеми пошлинами, и [с] Устюжнаю, и с Р[о]жаловым, и с Велетовым, и с Кистмою, и со всем тем, как было за князем за Дмитреем за Шемякою. Да даю ему Бежецкой Верх и с волостми, и с путми, и с селы, и со всеми пошлинами, да Звенигород с волостми и с путми, и [с] сълы, и со всеми пошлинами, а у Москвы село Сущовское и з дворы з городскими, и что к нему потягло. А чем его благословила баба его, Вышелесом, ино то его и есть.
А сына своего Бориса благослов[л]яю в Москве годом княжим Ивановым Можайского, да в городе на посаде дворы около Егорья, каменые церкви Марьинские Федоровы. Да даю ему Ржеву с волостьми с волостми и с путми, и с сълы, и с пошлинами, и з бортью. Да даю ему Волок с волостми и с путми и с селы и со всеми пошлинами, да Рузу с волостми, и путми, и с селы, и с пошлинами. А што его благословила моя мати, великая княги[ня] Софья, баба его, на Волоце белевутовскими селы, Спаским селом и з дер[е]внеми, да Издетемлею [с] кораковскими селы, ино то ему и есть. А што ему дала Марья Федорова Голтяева на Коломне села Проскурниковское да Веденьское и з деревнями, и на Городне деревня, и на Москве за Похрою розсудовския села, Зверевское и Борановское, и иные села, и з деревнями и с пустошми, и в Володимери симизинскии села, и Лазаревское и Котязино, и что к те[м] селом потягло, как было за Марьею, да у города у Володимеря Евнутьевьское село, да на Костроме на Волзе Нижьняа слобода со всеми деревнями, да Базеевское, да Мануиловское и з деревнями, да на Вологде Турутаевское, да Понизовное, да кобылинскиа села, да Горка, да на Шоме деревни, да у Москвы село Шарапово з деревнями, да Лошаково з деревнями, да луг на реце на Москве под Крутицею, да в Берендееве село Ростовцовское и з д[е]р[е]внями, да в Кинеле Суровцово, да Тимофее[в]ское, да Микульское, ино то его и есть. Да што, ему дала Марья же двор свой внутри города на Москве, ино то его и есть.
А сына своего Андрея Меншаго благослов[л]яю в Москве годом княжим Петровым Дмитреевича, да у Москвы село Танинское со всем, да Ясеневское со всем, да Раменейцо со всем. Да даю ему Вологду и с Кубеною, и с Заозерьем со всем, и что к Вологде и к Кубене, и к Заозерью потягло, и с пошлинами, да Иледом, с Обнорою и с Комелою, и с Волочком, да Авнегу, да Шиленгу, да Пелосму, да Бохтегу, да Ухтюжку, да Сяму, и Отводное с перфушковскими селы, да Тошну, да Янгосарь и с всем с тем, што к тем волостем потягло.
А княгини своей даю Ростов и со всем, што к нему потягло, и с сълы своими, до ея живота. А князи ростовские что ведали при мне, при великом князи, и они по тому и держат и при моей княгини, а княгини моя в то не вступается у них. А возмет бог мою княгиню, и княгиня моя дает Ростов сыну своему Юрью, а он держит его по тому же, как держала его мати, что князи ведали свое, и они по тому же держат. А что ее купля городок Романов княже Михайлове Деева и княжих Лвовых детей, и княжо Давидова Засекина, и Усть-Шоксны, што собе купила у князя у Семена и у князя у Василья у Шаховских, ино то ее и есть, в то ся дети мои не вступают. А что были волости Заволские и по реце по Шексне княжи Иванова Можайского и села его, и езы, и те есмь все волости, и села, и деревни тех сел, и езы дал есми своей княгине, и с Пироговскими селы Костянтиновича, да Усть-Угль всем и с езы. Да даю своей княгине Нерьхту с варницями и со всеми пошлинами. А из московских сел даю своей княгини Напрудское у города и з дворы з городскими, и что к нему потягло, да Ходынскую мелницу и с лугом Ходынским, да опосле княгинина Василисина живота села Ногатинское моей княгини и з дворы з городскими и со всем, што к нему потягло, да Новинки. Да даю своей княгини озерьцские села и з деревн[я]ми, да Михайловское и з д[е]р[е]внями, да Олешну и з деревнями. А что есмь у своей княгини взял Селивановское село в Медушах, да и дал к святей Троици, и яз в то место даю своей княгини села свои лужские и Павшинское, и д[е]р[е]вни Петровские Костянтиновича на Истре. А из удела сына своего Иванова, ис Коломны, даю своей княгини волостей Город, Брашеву и с Селцом и з Гвоздною, и с-Ыванем, да Усть-Мерьску, да Песочну, да малинскии села. Да даю своей княгини село Серкизовское и с Мезынькою, и со всеми селци и з д[е]р[е]внями, да село Высокое и з бортью, и з д[е]р[е]внями, да село Щкинь и з д[е]р[е]внями, и з Федоровским селцом Степанова сына, и с Свербеевским, с куплею своею, да село Лысцевское и з д[е]р[е]внями, да Бабышево у города у Коломны, что ей дала моя мати, великая княгини, и з дворы з городскими, что к нему потягло, да село Чюхистово, что дал ей Михайло Сабуров, и со всем с тем, что к нему потягло. А в Переславли даю своей княгини село Рюминское и з дворы з городскими, да Марьину слободу, да село Доброе з дворы з городскими, которыя дворы к путнику тянули. А в Юрьеве даю своей княгини село Фроловское с [Е]лхом, да село Красное, да Курчеева, да Елци, да Варварино, да Кузминдемьянское, да Голенищово, да Добрынское, да Волстриновское, да Сурогошино, да Петроковскии села Костян[тин]овича Матфеищово, да Вороново, и с-ыными селци. А в Суждале даю своей княгини Шокшов да Давыдовское. А на Костроме даю ей Михайловскии села Данилова со всем, что к ним потягло. Да что дал ей Михаило Сабуров колдамские села, ино ей и есть. А на Устюзе даю ей, своей княгине, к ее купле, к Левонтиевъскому, да к Пятницкому, да к Вондокурье свои села, село Мошемьское и з д[е]ревнями и с присельи, да Дымкову сторону и з дер[е]внями и с приселки. А у сына у своего у Андрея у Болшого из удела даю своей княгине Елду, да Катку, да Васильевьское и з деревнями. А у сына у своего у Бориса из удела даю своей княгине Издетемлю, да Июдову слободу, да Ядрово, да в Рожьтве село Ондреевское. А у сына своего у Андрея у Меншого даю своей княгине из его удела Иледам с Комелою и с Обнорою. А возмет бог мою княгиню, а у которого сына в уделе волости и села, что есмь ей подавал, ино того то им и есть, опричь ее купли. А что ее купли, Романов городок и Шоксна, [и] иные волости и села, в которых городех ни буди, в том вольна моя княгини, опосле своего живота – которому сыну восхочет дать своему, ина тому даст.
А что моя томга московскаа, и яз даю сыну своему Ивану треть тамги со всеми пошлинами, а другую треть, княжу Володимеровскую, даю сыну своему Юрью да Ондрею Болшему по половинам, а третью треть даю сыну своему Борису да Ондрею Меншему по половинам. А ис тех изо всех трех третей дал есмь половину тамги своей княгини, со всеми пошлинами до ее живота, а по ее животе и она отдасть им их жеребьи по сей духовной, как им писано.